Бага насныхан согтуурчээ
-Архидан согтуурахтай тэмцэх тухай хуульд өөрчлөлт оруулъя-
10-13 насны дөрвөн хүү даараад архи уусан гэнэ. Гайхаад ч баршгүй ийм нэгэн явдал нийслэлд уржигдар болов. Тэдний нэг 1300 төгрөгтэй явжээ. Архины мөнгө олохын тулд хоёр нь гуйлаг гуйж, нэг нь "ТҮ мэдээ" сонин заржээ. Ингээд 3500 төгрөгөөр Яармагийн эцэст байрлах "Мөрөн" дэлгүүрээс 21.00 цагийн орчим "Бурхан халдун" нэртэй архи худалдан авч, илүү гарсан мөнгөөрөө тамхи авчээ.
Хөвгүүдийн нэг тамхи татаж байгаад Б-гийнхээ гар дээр цогоо унаган улмаар маргалдан хоорондоо гар зөрүүлжээ. Хүүхдүүд зодолдох үед гудамжинд явж байсан нэгэн залуу "Яагаад зодолдоод байгаа хүүхдүүд вэ" хэмээн "хэрэгт" оролцоход хөвгүүдээс архи үнэртэж байсан тул эргүүлийн цагдаа нарт мэдэгдэж тэднийг саатуулсан аж.
Хөвгүүдийн нэг архиндаа хэт согтсон, бусад нь халамцуу байсан байна.
Дээрх хүүхдүүдийн нэг нь сургуульд явдаг бусад нь гадуур тэнэдэг аж. "Тэдэнд эцэг, эх бий. Гэхдээ ар гэрийнхэн нь төдийлөн хайхрахгүй юм. Энэ хүүхдүүд манайд бүртгэлтэй" хэмээн Цагдаагийн хэлтсийн хүүхдийн байцаагч, ахлах дэслэгч Ц.Жаргалмаа хэлсэн юм.
Саатуулагдсан хүүхдүүд ТБД андууд, Циркийн орчмоор явдаг гэнэ. Тэгж байхдаа траншейны хүүхдүүдтэй нийлж анх архи уусан аж. Үүнээс хойш хоёр удаа архи уусан байна. Тэдний нэг 3 гэх хүүгээс зарим нэг зүйл асуулаа.
-Мөнгө хаанаас олсон юм?
-Надад байсан.
-Архи уух санаачилгийг хэн гаргасан бэ?
-Б гаргасан.
-Юунаас болж архи уухыг хүсээ вэ?
-Орой болоод, даараад архи уусан.
-Гэртээ харихгүй яасан юм бэ?
-Харимааргүй санагдаад.
-Гэртээ хэдүүлээ амьдардаг вэ?
-Ам бүл зургаа. Би хамгийн бага нь.
-Гадуур тэнэхгүй байж болохгүй байна уу?
-Гэртээ харихаар тэнэмээр санагдаад байдаг юм.
-Ээж, аав чинь чамд хатуурхаад байдаг юм уу?
Хүү дуугарсангүй. Үдшийн бүрий болчихоод байхад аравхан настай жаахан хүүхдүүдэд архи зараад зогсдог дэлгүүрийн худалдагч гэж байх уу. Архи уучихаад хүүхдүүд ямар нэгэн байдлаар гэмт халдлагад өртсөн бол, амиа алдсан бол яах вэ. Хэдэн халтар төгрөг олж л байвал бусдын хэрэг хамаагүй гэсэн ухвар мөчид хүмүүс өнөөдөр олширсоор байна. Бяцхан хүүхдүүдэд эцэг, эхчүүд, төр засаг анхаарал хандуулахгүй бол болохоо байх нь. Архидан согтуурахтай тэмцэх тухай "түүхий" хуулиа нэг эргэж харах болжээ. Бага насны хүүхдэд архи зарахыг энэ хуулиар хориглосон. Гэвч хүүхдэд архи зарсан худалдагчийг 25 мянган төгрөгөөр торгоод өнгөрч болно гэж үү.
Comments